संपादक : पोपट मारुती मिंड
फलटण( आपलं फलटण)
पिंप्रद (ता. फलटण) येथे डॉ. बाबासाहेब आंबेडकर जयंती यंदा डीजे व फटाकेमुक्त साजरी करून एक वेगळाच सामाजिक संदेश देण्यात आला. अनावश्यक खर्चाला फाटा देत त्या निधीतून गरजू व मागासवर्गीय विद्यार्थ्यांना शालेय गणवेश व शैक्षणिक साहित्य वाटप करण्याचा स्तुत्य उपक्रम राबविण्यात आला. या अभिनव संकल्पनेमुळे या गावाने समाजासमोर आदर्श निर्माण केला असून, बाबासाहेब आंबेडकर जयंती उत्सव समितीच्या कार्याचा लवकरच गौरव करण्यात येणार असल्याची माहिती तहसीलदार डॉ. अभिजित जाधव यांनी दिली.
भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त पिंप्रद येथील सभागृहात आयोजित रक्तदान शिबिराचे उद्घाटन तहसीलदार डॉ. जाधव यांच्या हस्ते पार पडले. यावेळी जेष्ठ पत्रकार अजय माळवे, निवासी नायब तहसीलदार अभिजित सोनवणे, नायब तहसीलदार तुषार गुंजवटे, योगेश धेंडे, शाळा समिती अध्यक्ष जनार्दन भगत आदी मान्यवर उपस्थित होते.
यावेळी बोलताना डॉ. जाधव यांनी, “डीजे व फटाकेमुक्त जयंतीमुळे समाजात सकारात्मक विचारांचा प्रसार होत असून, वाचवलेला निधी समाजोपयोगी कार्यासाठी वापरणे ही खऱ्या अर्थाने जयंतीची सार्थकता आहे,” असे मत व्यक्त केले.
प्रास्ताविकात मार्गदर्शक सचिन मोरे यांनी समिती गेल्या चार वर्षांपासून सातत्याने समाजाभिमुख उपक्रम राबवत असल्याचे सांगितले. जयंती उत्सव केवळ एक दिवसापुरता मर्यादित न ठेवता वर्षभर विविध सामाजिक उपक्रम व विद्यार्थी शिबिरे राबविण्यात येत असल्याचे त्यांनी नमूद केले.
शरद मोरे यांनी आभार मानले. यावेळी विक्रांत मोरे, विकास मोरे, बापूराव मोरे, संतोष मोहिते, अमर मोरे, राहुल मोरे, विजय बनसोडे आदी पदाधिकारी उपस्थित होते. रक्तदान शिबिरास नागरिकांचा उत्स्फूर्त प्रतिसाद लाभला, यामुळे उपक्रमाची सामाजिक बांधिलकी अधोरेखित झाली.
