संपादक : पोपट मारुती मिंड
फलटण ( आपलं फलटण) प्रेमसंबंधाच्या वादातून १८ वर्षीय युवकाची 4-5 जणांनी मिळून निर्घृण हत्या केल्याची धक्कादायक घटना फलटण तालुक्यात उघडकीस आली आहे. या प्रकरणी पोलिसांनी चार संशयितांविरुद्ध खूनाचा गुन्हा दाखल केला असून दोघांना ताब्यात घेतले आहे.
मिऱ्याचीवाडी (ता. फलटण) येथील सोमनाथ संदीप जाधव (वय १८) असे मृत युवकाचे नाव आहे. या प्रकरणी आदित्य विजय शिंदे, ओम लोखंडे, विटया लोखंडे, पिंटू लोखंडे (सर्व रा. ढवळ, ता. फलटण) यांच्याविरुद्ध गुन्हा दाखल करण्यात आला आहे. आदित्य विजय शिंदे याला व नृसिंह शिंदे यालाही तपासादरम्यान ताब्यात घेण्यात आले आहे. अन्य तिघांचा पोलीस तपास करीत आहेत
पोलिसांनी दिलेल्या माहितीनुसार, सोमनाथ हा एका मुलीशी मोबाईलवरून संपर्कात होता. याच कारणावरून संबंधित मुलीच्या नातेवाईकांना राग होता. १० एप्रिल २०२६ रोजी रात्रीच्या सुमारास सोमनाथला फोन करून ढवळपाटी परिसरात बोलावण्यात आले.
दरम्यान, रात्री सुमारे १.१५ वाजता सोमनाथच्या वडिलांना त्याच्याच मोबाईलवरून अनोळखी व्यक्तीने फोन करून “तुमचा मुलगा ढवळपाटी येथे आहे, तातडीने या,” असे सांगितले. वडील तेथे पोहोचल्यावर पुन्हा मिऱ्याचीवाडी कमानीजवळ येण्यास सांगण्यात आले. तेथे लाल रंगाच्या कारमधून सोमनाथसह काही जण उतरले.
“तुमचा मुलगा आमच्या बहिणीशी चॅटिंग करतो, त्याला आम्ही जिवंत ठेवणार नाही,” असे सांगत संबंधितांनी त्याला बेदम मारहाण केल्याचे फिर्यादीत नमूद आहे. त्यानंतर आणखी दोघे मोटरसायकलवर येऊन सर्वांनी मिळून सोमनाथला लाथा-बुक्क्यांनी तसेच तोंड, छाती व पोटावर मारहाण केली. जीव वाचवण्यासाठी तो पळू लागला असता त्याचा पाठलाग करून ढवळपाटी येथील व्यापारी गाळ्यांच्या मागील पटांगणात व मिऱ्याचीवाडी कमानीजवळ पुन्हा मारहाण करण्यात आली.
गंभीर जखमी अवस्थेत सोमनाथला प्रथम फलटण येथील खाजगी दवाखान्यात नेण्यात आले. डॉक्टरांनी पुढील उपचारासाठी बारामती येथे हलविण्याचा सल्ला दिला; उपचारासाठी पुढे नेण्यास आर्थिक परिस्थिती नसल्याने त्याला घरी नेण्यात आले मात्र नंतर तो काहीच प्रतिसाद देत नसल्याने त्याला पुन्हा फलटण येथील उपजिल्हा रुग्णालयात नेण्यात आले. तेथे डॉक्टरांनी तपासणी करून त्याचा मृत्यू झाल्याचे घोषित केले.
या घटनेमुळे परिसरात भीतीचे वातावरण निर्माण झाले आहे. पोलिस निरीक्षक संदीप जगताप यांच्या मार्गदर्शनाखाली पुढील तपास सुरू आहे.
