संपादक : पोपट मारुती मिंड
फलटण ( आपलं फलटण)
फलटणच्या शैक्षणिक विश्वासाठी अभिमानाची ठरावी अशी महत्त्वपूर्ण घडामोड घडली असून, फलटण एज्युकेशन सोसायटीच्या इंजिनिअरिंग कॉलेजला (PESCOE) ‘स्वायत्त संस्था’ (Autonomous Status) दर्जा प्राप्त झाला आहे. ही माहिती आमदार रामराजे नाईक निंबाळकर यांनी दिली. या मान्यतेमुळे महाविद्यालयाच्या प्रगतीपथावर नवे पर्व सुरू झाले असून, विशेषतः ग्रामीण भागातील विद्यार्थ्यांसाठी आधुनिक, दर्जेदार आणि उद्योगाभिमुख शिक्षणाची दारे अधिक व्यापकपणे खुली झाली आहेत.
आ.रामराजे म्हणाले स्वायत्त दर्जामुळे महाविद्यालयाला आता अभ्यासक्रम रचनेपासून मूल्यमापनापर्यंत स्वतंत्र निर्णय घेण्याचे स्वातंत्र्य लाभले आहे. त्यामुळे पारंपरिक शिक्षणपद्धतीच्या चौकटीबाहेर जाऊन विद्यार्थ्यांना कौशल्याधारित, उद्योगसुसंगत आणि अद्ययावत शिक्षण देणे शक्य होणार आहे. परिणामी, विद्यार्थ्यांच्या रोजगारक्षमतेत वाढ होऊन प्लेसमेंटच्या संधी अधिक विस्तारतील, असा विश्वास व्यक्त केला जात आहे.
तंत्रज्ञानाच्या झपाट्याने बदलणाऱ्या युगाचा विचार करून आगामी शैक्षणिक वर्षापासून आर्टिफिशियल इंटेलिजन्स अँड डेटा सायन्स (AI & DS) तसेच आर्टिफिशियल इंटेलिजन्स अँड मशीन लर्निंग (AI & ML) हे अत्याधुनिक डिप्लोमा व पदवी अभ्यासक्रम सुरू करण्याचा निर्णय महाविद्यालयाने घेतला आहे. या अभ्यासक्रमांना महाराष्ट्र राज्य तंत्र शिक्षण मंडळ (MSBTE) आणि डॉ. बाबासाहेब आंबेडकर तंत्रशास्त्र विद्यापीठ (BATU) यांची मान्यता मिळाली असून, अखिल भारतीय तंत्रशिक्षण परिषद (AICTE) यांचीही सकारात्मक शिफारस प्राप्त झाली आहे.
महाविद्यालयाच्या नव्या भव्य इमारतीत सुसज्ज संगणक प्रयोगशाळा, हाय-स्पीड इंटरनेट, आधुनिक सेमिनार हॉल्स आणि समृद्ध ग्रंथालय यांसारख्या सुविधा विद्यार्थ्यांसाठी उपलब्ध करून देण्यात आल्या आहेत. या अत्याधुनिक सुविधांमुळे ग्रामीण भागातील विद्यार्थ्यांना जागतिक दर्जाचे शिक्षण स्थानिक पातळीवरच मिळण्याचा मार्ग मोकळा झाला आहे.
दरम्यान, विद्यापीठ अनुदान आयोगाकडून (UGC) मिळालेल्या स्वायत्त दर्जामुळे प्रवेश प्रक्रियेतही महत्त्वपूर्ण बदल होणार असून, यावर्षीपासून सर्व प्रवेश प्रक्रिया ‘ऑटोनॉमस इन्स्टिट्यूट’ म्हणून पारदर्शक व सुलभ पद्धतीने राबविण्यात येणार आहे.
प्राचार्य मनोज कुमार दळवी म्हणाले महाविद्यालयात स्वायत्त संस्था दर्जा मिळाल्याने संस्थेने यशाचे सर्वोच्च शिखर गाठले आहे जिल्ह्यातील सर्वोत्तम कॉलेज म्हणून महाविद्यालयाचा लौकिक वाढला असून स्वायत्तेमुळे महाविद्यालयाला उद्योगांच्या गरजेनुसार स्वतःचा आधुनिक अभ्यासक्रम राबवता हा येणार आहे यामुळे नामांकित कंपन्या सोबत थेट सहकार्य वाढवून विद्यार्थ्यांना दर्जेदार प्लेसमेंट मिळणे सुलभ होणार आहे.
प्राचार्य डॉ. मनोजकुमार दळवी यांच्या सक्षम नेतृत्वाखाली प्रा. शांताराम कळेळ, प्रा. दिपाली जाधव, डॉ. दत्तात्रय शिंदे, प्रा. किशोरी कुमठेकर, प्रा. तेजश्री जाधव आदींच्या समर्पित टीमचे मोलाचे योगदान आहे. त्यांच्या सातत्यपूर्ण प्रयत्नांमुळेच महाविद्यालयाने ही उल्लेखनीय झेप घेतली आहे. या यशाबद्दल आमदार रामराजे नाईक निंबाळकर, रघुनाथ राजे नाईक निंबाळकर, संजीव राजे नाईक निंबाळकर, अनिकेत राजे नाईक निंबाळकर तसेच प्रशासन अधिकारी अरविंद निकम आदींनी सर्व टीमचे अभिनंदन केले.
फलटण एज्युकेशन सोसायटीच्या या प्रगतीमुळे फलटणची ओळख पश्चिम महाराष्ट्रातील उदयोन्मुख शैक्षणिक केंद्र म्हणून अधिक भक्कम झाली असून, येत्या काळात या संस्थेमधून तंत्रज्ञान क्षेत्रातील कुशल आणि सक्षम मनुष्यबळ घडण्यास मोठा हातभार लागणार आहे.
