संपादक : पोपट मारुती मिंड
फलटण( आपलं फलटण प्रतिनिधी) धुळदेव (ता. फलटण) येथे महात्मा फुले कृषी विद्यापीठ, राहुरी संलग्न फलटण एज्युकेशन सोसायटीच्या कृषी महाविद्यालयातील सातव्या सत्रातील कृषीकन्यांनी ग्रामीण जागरूकता कार्यानुभव व औद्योगिक जोड प्रकल्प कार्यक्रमांतर्गत शेतकऱ्यांना विविध कृषी विषयक मोबाईल ॲप्लिकेशन्सची माहिती देत मार्गदर्शन केले.
यावेळी कृषीकन्या तेजश्री जाधव, वैष्णवी वाघमारे, अस्मिता काटकर, सिद्धी धुमाळ, कावेरी पळसकर, सुवर्ण धंदाळे व वैभवी ननावरे यांनी ई-नाम, इफको किसान, एमएसएएमबी आणि भारत अ‍ॅग्री यांसारख्या कृषी क्षेत्रासाठी उपयुक्त ॲप्सचे प्रात्यक्षिक सादर केले. या ॲप्सच्या माध्यमातून बाजारभाव, कीड व रोग व्यवस्थापन, खतांच्या किंमती, प्रगतशील शेतकऱ्यांचे अनुभव तसेच शेतीविषयक अद्ययावत माहिती कशी मिळवता येते याची सविस्तर माहिती शेतकऱ्यांना देण्यात आली.
तसेच आधुनिक तंत्रज्ञानाचा वापर करून शेतीचे अर्थनियोजन, उत्पादन खर्चाचे व्यवस्थापन आणि बाजारपेठेची माहिती मिळविण्यासाठी कृषी ॲप्स कशाप्रकारे उपयुक्त ठरतात, याविषयीही मार्गदर्शन करण्यात आले. या उपक्रमाला शेतकऱ्यांचा उत्स्फूर्त प्रतिसाद लाभला.
कृषी महाविद्यालयाचे प्राचार्य डॉ. यू. डी. चव्हाण, श्रीमंत शिवाजी राजे उद्यानविद्या महाविद्यालयाचे प्राचार्य डॉ. एस. डी. निंबाळकर, कार्यक्रम समन्वयक प्रा. निलिमा धालपे, कार्यक्रम अधिकारी प्रा. नितिषा पंडित व प्रा. सुरेश साळुंखे यांच्या मार्गदर्शनाखाली हा उपक्रम यशस्वीरित्या पार पडला.
