संपादक : पोपट मारुती मिंड
फलटणमध्ये ‘हेरिटेज संगीत महोत्सव’ची रंगत; दिग्गज कलाकारांची मेजवानी
फलटण (आपलं फलटण) कला प्रसारक संस्था आणि गोविंद मिल्क अँड मिल्क प्रॉडक्ट्स प्रा. लि. यांच्या संयुक्त विद्यमाने फलटण येथे ‘हेरिटेज संगीत महोत्सवा’चे आयोजन करण्यात आले आहे. भारतीय शास्त्रीय संगीताचा प्रसार व नव्या पिढीपर्यंत त्याची परंपरा पोहोचविण्याच्या उद्देशाने हा महोत्सव साकारला जात असून, शहराच्या सांस्कृतिक ओळखीला नवी उभारी मिळणार आहे.
दि. १७ व १८ एप्रिल रोजी सायं. ६ ते ९ या वेळेत मुधोजी हायस्कूल रंगमंचावर हा महोत्सव पार पडणार आहे. या दोन दिवसीय कार्यक्रमात शास्त्रीय संगीत, नाट्यसंगीत, अभंग, वाद्यवृंद, जुगलबंदी, नृत्य आणि चित्रपट संगीताचा बहारदार संगम अनुभवायला मिळणार आहे.
महोत्सवात आंतरराष्ट्रीय ख्यातीचे कलाकार पं. केदार जाधव यांचे सादरीकरण होणार असून, ‘जादुई पेटी’ हा विशेष कार्यक्रम रसिकांसाठी आकर्षण ठरणार आहे. याशिवाय युवा कलाकार रसिका वैंशंपायन व प्रियांका चौधरी-ढेरंगे, तनमय टेमझरे, कृष्णा भोईटे, सुधीर टेकाळे यांचेही सादरीकरण रंगणार आहे. तसेच नंदिता व निवेदिता देशपांडे यांचे कथक नृत्य रसिकांना मंत्रमुग्ध करणार आहे.
या महोत्सवामुळे फलटणमध्ये शास्त्रीय संगीताची नवी परंपरा रुजत असून, स्थानिक तसेच बाहेरील कलाकारांना व्यासपीठ उपलब्ध होत आहे. रसिकांनी मोठ्या संख्येने उपस्थित राहून या सांगीतिक मेजवानीचा आनंद घ्यावा, असे आवाहन आयोजकांच्या वतीने करण्यात आले आहे.
