संपादक : पोपट मारुती मिंड
सातारा (प्रतिनिधी) : सातारा आणि फलटण या दोन ऐतिहासिक राजघराण्यांमधील ऋणानुबंधांची परंपरा पुन्हा एकदा उजळून निघाली. फलटण संस्थानचे श्रीमंत रघुनाथराजे नाईक निंबाळकर यांनी साताऱ्यातील जलमंदिर पॅलेस येथे खासदार श्रीमंत उदयनराजे भोसले यांची सदिच्छा भेट घेतली.
या स्नेहभेटीत दोन्ही मान्यवरांमध्ये अत्यंत आपुलकीचे व स्नेहपूर्ण वातावरण अनुभवायला मिळाले. पिढ्यानपिढ्या चालत आलेल्या नातेसंबंधांचा धागा अधिक दृढ होत असल्याचे यावेळी प्रकर्षाने जाणवले.
भेटीदरम्यान दोन्ही घराण्यांच्या वैभवशाली इतिहासाचा आढावा घेत, हा ऐतिहासिक वारसा जतन करून पुढील पिढीपर्यंत पोहोचवण्याची गरज अधोरेखित करण्यात आली. तसेच भूतकाळातील आठवणी, प्रसंग आणि ऐतिहासिक संदर्भांना उजाळा देत काही भावनिक क्षणही अनुभवले गेले.
राजकीय व सामाजिक व्यस्ततेतून वेळ काढत दोन्ही मान्यवरांनी खेळीमेळीच्या वातावरणात मैत्रीचे क्षणही सामायिक केले. या स्नेहभेटीतून परस्पर आदर, जिव्हाळा आणि ऐतिहासिक परंपरेची झलक पाहायला मिळाली.
दरम्यान, या भेटीमुळे सातारा व फलटण या दोन्ही घराण्यांमधील नातेसंबंध नव्या उर्जेने अधिक दृढ झाल्याची भावना समर्थकांमध्ये व्यक्त होत असून, परिसरात समाधान व आनंदाचे वातावरण निर्माण झाले आहे.
