संपादक : पोपट मारुती मिंड
आपलं फलटण प्रतिनिधी : महाराष्ट्र लोकसेवा आयोगामार्फत घेण्यात आलेल्या सन २०२५ च्या गट-क परीक्षेत रोहित नारायण कदम यांनी उज्ज्वल यश संपादन केले असून, त्यांची महसूल सहाय्यक पदावर निवड झाली आहे. जिद्द, चिकाटी आणि सातत्यपूर्ण अभ्यासाच्या जोरावर मिळविलेल्या या यशामुळे कदम कुटुंबीयांसह मित्रपरिवार आणि शुभेच्छुकांमध्ये आनंदाचे वातावरण निर्माण झाले आहे.
रोहित कदम यांचे प्राथमिक व माध्यमिक शिक्षण शिवाजी हायस्कूल, वडूज येथे झाले. त्यानंतर त्यांनी अकरावी व बारावी विज्ञान शाखेचे शिक्षण मालोजीराजे शेती महाविद्यालय, फलटण येथे पूर्ण केले. पुढे राजश्री छत्रपती शाहू महाराज अॅग्रीकल्चर कॉलेज, कोल्हापूर येथून कृषी पदवीचे शिक्षण पूर्ण केल्यानंतर त्यांनी फलटण येथे स्पर्धा परीक्षेच्या तयारीस सुरुवात केली.
गेल्या तीन वर्षांपासून रोहित कदम यांनी अत्यंत जिद्दीने, सातत्याने आणि चिकाटीने स्पर्धा परीक्षेचा अभ्यास केला. अनेकदा येणाऱ्या अडचणींवर मात करत त्यांनी आपल्या ध्येयावर लक्ष केंद्रित ठेवले. अखेर महाराष्ट्र लोकसेवा आयोगाच्या परीक्षेतील यशाने त्यांच्या मेहनतीला आणि स्वप्नांना मूर्त स्वरूप मिळाले.
रोहित यांच्या यशामध्ये त्यांच्या आई वर्षा कदम यांचा मोलाचा वाटा असल्याचे त्यांच्या कुटुंबीयांनी नमूद केले. अभ्यासाच्या काळात सातत्याने दिलेले प्रोत्साहन, मानसिक आधार आणि कुटुंबाची साथ यामुळे रोहित यांना ध्येय गाठण्यासाठी बळ मिळाले.
शासकीय सेवेत प्रवेश मिळाल्यानंतर प्रामाणिकपणे आणि संवेदनशीलतेने नागरिकांची सेवा करण्याचा आदर्श ठेवावा, अशी अपेक्षा त्यांच्या कुटुंबीयांनी व्यक्त केली आहे. स्पर्धा परीक्षेच्या माध्यमातून शासकीय सेवेत जाण्याचे स्वप्न पाहणाऱ्या ग्रामीण भागातील युवकांसाठी रोहित कदम यांचे यश प्रेरणादायी ठरले आहे.
रोहित कदम यांच्या यशाबद्दल महाराष्ट्र राज्य ग्रामसेवक संघ, जिल्हा शाखा साताराचे अध्यक्ष श्री. पी. बी. नाळे, सचिव श्री. एन. एफ. शेख, मानद अध्यक्ष श्री. सी. एम. शिंदे यांच्यासह आर. एम. फडतरे, एच. आर. फडतरे, जी. बी. खोमणे, व्ही. बी. खोमणे, संदीप गावडे, दादासो गावडे, एम. आर. महामुनी, बबन पानसरे, आर. पी. ननावरे, राम सावंत, आर. आर. भोसले, योगेश शेळके आदींनी अभिनंदन केले.
तसेच अमोल धुमाळ यांनीही रोहित कदम यांचे अभिनंदन करून पुढील शासकीय सेवेसाठी शुभेच्छा दिल्या.
‘आपलं फलटण’चे संपादक पोपट मिंड यांच्यासह सीएम ग्रुप मित्र परिवाराने रोहित कदम यांच्या उल्लेखनीय यशाबद्दल अभिनंदन करून भावी वाटचालीस शुभेच्छा दिल्या.
