संपादक : पोपट मारुती मिंड
फलटण( आपलं फलटण )भारती विद्यापीठांतर्गत ८ फेब्रुवारी २०२६ रोजी घेण्यात आलेल्या इंग्रजी बहिःस्थ (इंग्रजी–एन्ट्रन्स) परीक्षेत फलटण एज्युकेशन सोसायटीच्या मुधोजी हायस्कूल व ज्युनियर कॉलेजने पुन्हा एकदा आपल्या गुणवत्तेचा ठसा उमटवला. इयत्ता सातवीतील कु. कृपा प्रशांत रणवरे हिने १०० पैकी तब्बल ९६ गुण मिळवत राज्यात तृतीय क्रमांक पटकावून विद्यालयाचा मान उंचावला. तिच्या या उल्लेखनीय यशाबद्दल तिला रोख पारितोषिक देऊन सन्मानित करण्यात आले.
इंग्रजी बहिःस्थ (इंग्रजी–एन्ट्रन्स/इंग्रजी–प्रायमरी) परीक्षेत मुधोजी हायस्कूलने सलग चौथ्या वर्षी उज्ज्वल यशाची परंपरा कायम राखत राज्यपातळीवर आपली गुणवत्ता अधोरेखित केली आहे. कु. कृपा रणवरेच्या रूपाने विद्यालयाने पुन्हा एकदा राज्यात ठसा उमटवला असून इतर अनेक विद्यार्थ्यांनीही घवघवीत यश संपादन करत प्रशालेचा नावलौकिक वाढवला आहे.
इयत्ता सहावी इंग्रजी प्रायमरी परीक्षेसाठी एकूण ९१ विद्यार्थी बसले होते. त्यापैकी ३७ विद्यार्थ्यांनी विशेष प्रावीण्य मिळवले, तर १२ विद्यार्थ्यांनी प्रथम श्रेणी प्राप्त केली. तसेच इयत्ता सातवी इंग्रजी एन्ट्रन्स परीक्षेसाठी ११७ विद्यार्थी सहभागी झाले होते. त्यामध्ये ६० विद्यार्थ्यांनी विशेष प्रावीण्य मिळवत उत्कृष्ट कामगिरी बजावली, तर २२ विद्यार्थ्यांनी प्रथम श्रेणी मिळवली.
या उल्लेखनीय यशामागे विद्यालयातील इंग्रजी बाह्य परीक्षा विभाग प्रमुख श्री. अमोल सपाटे, इंग्रजी विभाग प्रमुख सौ. सोहनी सस्ते, तसेच विषय शिक्षक श्री. सचिन धुमाळ, कु. संगीता कदम, सौ. मुक्ता शिंदे, कु. सुषमा घोरपडे व सौ. विभा गुजर यांचे मार्गदर्शन लाभले.
कु. कृपा रणवरेच्या यशाबद्दल तिचे व मार्गदर्शक शिक्षकांचे महाराष्ट्र राज्य विधान परिषदेचे माजी सभापती मा. श्रीमंत रामराजे नाईक निंबाळकर, माजी आमदार मा. दीपकराव चव्हाण, फलटण कृषी उत्पन्न बाजार समितीचे सभापती मा. श्रीमंत रघुनाथराजे नाईक निंबाळकर, सातारा जिल्हा परिषदेचे माजी अध्यक्ष मा. श्रीमंत संजीवराजे नाईक निंबाळकर यांच्यासह फलटण एज्युकेशन सोसायटीचे पदाधिकारी, प्रशासन अधिकारी श्री. अरविंद निकम, तपासणी अधिकारी श्री. दिलीप राजगुडा, सहाय्यक तपासणी अधिकारी श्री. सुधीर अहिवळे, प्राचार्य श्री. वसंतराव शेडगे, उपप्राचार्य श्री. ए. वाय. ननवरे, ज्युनियर कॉलेज उपप्राचार्य श्री. सोमनाथ माने, पर्यवेक्षक व शाळा व्यवस्थापन समिती सदस्यांनी अभिनंदन केले.
मुधोजी हायस्कूलच्या या दैदिप्यमान यशामुळे फलटणच्या शैक्षणिक क्षेत्राचा नावलौकिक अधिकच उंचावल्याच्या प्रतिक्रिया व्यक्त होत आहेत
