संपादक : पोपट मारुती मिंड
आपलं फलटण दि. २५ फेब्रुवारी २०२६.
शासकीय कर्मचाऱ्यांच्या वैद्यकीय खर्चाची प्रतिपूर्ती (Medical Reimbursement) जलद, पारदर्शक आणि सुलभ करण्यासाठी राज्य शासनाने ‘महाकर्मी मेडिकल बिल क्लेम वेब पोर्टल’ कार्यान्वित केले आहे. सार्वजनिक आरोग्य व कुटुंब कल्याण मंत्री प्रकाश आबिटकर यांच्या हस्ते या पोर्टलसह वैद्यकीय मनुष्यबळ व्यवस्थापनासाठीच्या ‘व्हीएएमएस’ (VAMS) प्रणालीचा शुभारंभ मुंबईत करण्यात आला. गेल्या अधिवेशनात दिलेल्या आश्वासनाची आरोग्य विभागाने तीन महिन्यांत पूर्तता केली असून, आता कर्मचाऱ्यांना त्यांचे वैद्यकीय अर्ज ऑनलाईन सादर करता येणार आहेत. यामुळे कार्यालयीन दिरंगाईला चाप बसून निश्चित कालमर्यादेत बिलांचा निपटारा होणार असल्याने कर्मचाऱ्यांना मोठा दिलासा मिळाला आहे.
याप्रसंगी मंत्री आबिटकर यांनी स्पष्ट निर्देश दिले की, यापुढे कर्मचाऱ्यांची सर्व वैद्यकीय बिले केवळ ऑनलाईन पद्धतीनेच निघाली पाहिजेत आणि जिल्हा शल्यचिकित्सकांनी प्रक्रियेत कोणताही विलंब होणार नाही याची दक्षता घ्यावी. ‘महाराष्ट्र कर्मचारी रुग्ण मित्र’ या संकल्पनेवर आधारित हे पोर्टल www.mahakarmi.com या संकेतस्थळावर उपलब्ध आहे. सोबतच सुरू करण्यात आलेल्या ‘व्हीएएमएस’ पोर्टलमुळे राज्यातील तज्ज्ञ डॉक्टरांची उपलब्धता, रिक्त पदे आणि बदल्यांची प्रक्रिया अधिक शास्त्रोक्त पद्धतीने राबवता येणार आहे. डेटा-आधारित या नवीन प्रणालीमुळे ग्रामीण व दुर्गम भागातील रुग्णसेवेचा दर्जा उंचावण्यास मदत होणार असून प्रशासकीय कामात मोठी गतिमानता येणार आहे.
