मोफत औषधोपचारासह आरोग्य शिबिर; रक्षक रयतेचा महिला फाउंडेशनचा आदर्श उपक्रम

मोफत औषधोपचारासह आरोग्य शिबिर; रक्षक रयतेचा महिला फाउंडेशनचा आदर्श उपक्रम
फलटण (आपलं फलटण)
रक्षक रयतेचा महिला सामाजिक फाउंडेशन, फलटण यांच्या वतीने आयोजित मोफत आरोग्य शिबिरात केवळ तपासणीच नव्हे तर महागडी औषधेही मोफत देत एक प्रेरणादायी सामाजिक उपक्रम राबविण्यात आला. या उपक्रमातून समाजासमोर आदर्श निर्माण झाला असून अशा उपक्रमांची सर्वांनी प्रेरणा घ्यावी, असे मत श्रीराम एज्युकेशन सोसायटीचे मानद सचिव व माजी नगरसेवक डॉ. सचिन सूर्यवंशी बेडके यांनी व्यक्त केले.
येथील नामदेवराव सूर्यवंशी बेडके महाविद्यालयात डॉ. बारकीज होमिओपॅथिक, ईश्वरपूर (इस्लामपूर) यांच्या सहकार्याने कॅन्सर वेदनामुक्ती, डोळ्यांचे आजार, जुनाट सर्दी, दमा, खोकला व विविध फंगल इन्फेक्शनवर मोफत तपासणी व औषधोपचार शिबिराचे आयोजन करण्यात आले होते. या वेळी आध्यात्मिक क्षेत्रातील परमपूज्य राजनकाका देशमुख महाराज, डॉ. उत्तमकुमार बारकी, सीए मंजुषा धायगुडे, नगरसेवक पंकज पवार, डॉ. अतुल दोशी, पत्रकार युवराज पवार, सामाजिक कार्यकर्ते मोहनराव पोतेकर आदी उपस्थित होते.
यावेळी बोलताना डॉ. बेडके म्हणाले, अनेक ठिकाणी आरोग्य शिबिरांमध्ये केवळ तपासणी केली जाते; मात्र येथे पंधरा दिवसांची मोफत औषधे दिली जात असल्याने हा उपक्रम विशेष ठरतो. कॅन्सरसारख्या गंभीर आजारांवरही उपचार देण्याचा प्रयत्न स्तुत्य असून, अशा शिबिरांचे आयोजन तालुक्यात अधिक प्रमाणात व्हावे यासाठी आपण सहकार्य करू, अशी ग्वाही त्यांनी दिली.
डॉ. उत्तमकुमार बारकी यांच्या कार्याचेही त्यांनी कौतुक केले. गोरगरीब रुग्णांसाठी ते आधारवड ठरत असून सामाजिक बांधिलकी जपत उत्कृष्ट वैद्यकीय सेवा देत असल्याचे त्यांनी नमूद केले.
परमपूज्य राजनकाका देशमुख महाराज यांनी फाउंडेशनच्या कार्याचे कौतुक करत, समाजासाठी निःस्वार्थ भावनेतून सुरू असलेले हे काम उल्लेखनीय असल्याचे सांगितले. पुढील सर्व उपक्रमांना आपला आशीर्वाद कायम राहील, असे त्यांनी स्पष्ट केले.
डॉ. बारकी यांनी होमिओपॅथिक उपचारांचे महत्त्व पटवून देताना, अनेक जटिल आजारांवर हे उपचार प्रभावी ठरत असल्याचा विश्वास व्यक्त केला. नगरसेवक पंकज पवार यांनी अशा उपक्रमांचे सातत्याने आयोजन व्हावे, असे आवाहन केले.
कार्यक्रमाचे स्वागत इम्तियाज तांबोळी यांनी केले, प्रास्ताविक नंदा बोराटे यांनी तर आभार मनीषा घडिया यांनी मानले. या शिबिरात एकूण २३७ रुग्णांची तपासणी करून त्यांना मोफत औषधे देण्यात आली.
या उपक्रमासाठी नामदेवराव सूर्यवंशी बेडके महाविद्यालय, डॉ. अतुल दोशी, हॉटेल ब्रह्मा प्युअर व्हेज, फलटण तसेच सामाजिक कार्यकर्ते मोहनराव पोतेकर यांचे मोलाचे सहकार्य लाभले.